Tradisjonen tru arrangerer Bokbyen i Fjærland boknetter midtsommars, frå 25. til 27. juni.
For 150 år sidan skreiv Aamund Olavsson Vinje «Ferdaminni frå sumaren 1860». Og til Bokbyen kjem denne gongen mange skandinaviske forfattarar og artistar som ikkje er redde for å ta beina fatt, samstundes som dei ofte skildrar lokale samanhengar, slik Vinje gjorde.
Blant desse er Kjartan Fløgstad, Maria Parr, Kjersti Rorgemoen, Agnes Ravatn, Mette Moestrup, Arnhild Skre, Lise Foss og Jon Severud, som alle med eit lauseleg utgangspunkt i å skriva om og frå stader og skal bidra med sitt.
Folkefest med boksal
Laurdagskvelden blir det stor bok- og folkefest på ferjekaia i Mundal. Dit kjem først og fremst mange heilt vanlege bokinteresserte, som leiger salstelt for å selja bøker dei har til overs.
– Bokmarknaden er og blir hovudpoenget med arrangementet Boknatti. Viss du har for mykje bøker i hyllene, er det å selja dei sjølv på boknettene den beste ideen eg kan koma på, seier dagleg leiar Eivind Ødegård.
For store og små
Ødegård opplyser elles at Boknatti skal innehalde kultur- og litteraturprogram for store og små, anten dei er bokfolk eller ei. Eit døme er den grønlandske kunstnaren Jessie Kleemann, som mellom anna vil læra barna å fortelja historier gjennom å laga masker og dansa etter grønlandsk tradisjon.
Hallingen Stein Torleif Bjella held gratiskonsert på kaien, hotellet har eige mattelt, og både bokauksjonar, intervju, opplesingar og samtaler mellom forfattarar står på programmet, fortel Ødegård. (NPK)
