Folkemusikar Kirsten Bråten Berg har samla 150 bånsullar, reglar og stev frå Setesdal i bokform, for å unngå at dei går i gløymeboka.
«Dommelidei» er tittelen, og boka, som er illustrert av elevar ved lokale skuler, vart lansert denne veka.
– Eg har vore veldig engsteleg for at vi misser denne tradisjonen. Vi tek det for gitt at nokon passar på det, men når rekrutteringa ikkje er særleg stor til verken folkemusikken eller dansen, så blir dei jo plutseleg borte, seier Bråten Berg til NRK.
Ho seier at bånsullar spesielt må takast vare på fordi det som oftast var ei bestemor eller mor som song for barnet sitt, og det var ikkje sikkert at dei heldt på med dette til ungane vart så store at dei kunne bånsullane sjølv.
Folkemusikaren trur folk over heile landet kan ha glede av materialet.
– Stoffet finn vi att over heile landet, tema som Bissa båni, og reven, rotta og grisen. Det er ikkje noko spesifikt Setesdal dette her. Formene du finn i boka er frå Setesdal, men songane har jo ikkje oppstått her, seier ho i intervjuet. (©NPK)
