Offentleg sektor har fått «mobilappsjuka», meiner redaktøren i Computerworld Norge. Departement og direktorat brukar millionar på å utvikla mobilappar svært få nyttar.
NRK har laga eit oversyn over alle dei ulike mobilappane som er utvikla i statleg regi. Det syner mellom anna at appane med få unntak vert lite nytta og at dei i liten grad vert oppdaterte regelmessig frå utviklaren si side, ifølgje kanalen.
– Det er ein sjukdom i offentleg sektor der ein trur ein må laga appar for kvar ein pris, fordi det er der ein trur ungdommen er. Det viser seg å vera feil, seier redaktør Aslak Borgersrud i Computerworld Norge.
Han meiner offentleg sektor har fått det han kallar «appsjuka», noko han trur kjem av kombinasjon av verketrong og rådløyse. Den vanlegaste feilen verksemder gjer, er at dei ikkje tenkjer over om det konkrete behovet dei har best vert dekt av ein app, meiner Borgersrud.
Statssekretær Jardar Jensen (H) i Kommunal- og moderniseringsdepartementet erkjenner at staten har eit stykke igjen å gå når det kjem til ei einskapleg satsing på mobil.
– Regjeringa er oppteken av å gje innbyggjarane betre og meir effektive tenester. Me har innsett at me ikkje er så gode som me burde vera, seier Jensen.
Han viser til at det er nedsett eit eige utval på statssekretærnivå som skal samordna bruken av informasjons- og kommunikasjonsteknologi i offentleg sektor. (©NPK)
