Eit nytt vedtak frå Finanstilsynet gjev kommunane ei auka pensjonsrekning på 5,5 milliardar kroner. For verksemder er utgifta venta å auka til 3,5 milliardar.
Dei auka pensjonskostnadene kjem av at Finanstilsynet har avgjort at høgste tillatne utrekningsrente for livsforsikring skal reduserast til 2 prosent frå nyttår, skriv Dagens Næringsliv.
Det tyder at verksemder som har ytingspensjon for dei tilsette, må betala inn ein større premie for å sikra at pensjonen til den einskilde tilsette vert på det nivået ytinga garanterer. Vanlegvis er det 66 prosent av sluttløn.
For kommunane vert altså premieauken på 5,5 milliardar kroner, ein auke på 14 prosent frå 40 milliardar i 2013. For private verksemder med ytingsordningar reknar Finanstilsynet med ein premieauke på 3,5 milliardar kroner. Også det er ein auke på 14 prosent samanlikna med 25 milliardar i fjor, skriv avisa.
Både Unio og KS krev no kompensasjon for å hindra kutt i kommunale tenester. (©NPK)
