Venstre sitt landsmøte synest lærarar i den norske skulen skal konsentrere seg om å undervise og ikkje på å lese seg opp på nye forskrifter dei får tilsendt frå departementet.
– Sidan den raudgrøne regjeringa overtok kunnskapsdepartementet har norske lærarar og rektorar motteke 148 nye forskrifter, lovendringar og rundskriv på korleis dei skal leggje opp undervisninga si. Det svarer til eit rundskriv eller pålegg annakvar veke i seks år. Det er nok no, Kristin Halvorsen, seier Bjørnar Hamre, Venstre sin ungdomskandidat til fylkestinget, og Sindre Horn, leiar Hordaland Unge Venstre, i eit lesarbrev i avisa Nordhordland.
Dei peikar vidare på at regjeringa har hatt som mål å auke tida lærarane underviser elevane, samstundes som kunnskapsdepartementet druknar lærarane i nye rundskriv og pålegg, som lærarane ikkje har kapasitet til å følgje opp.
– Åtte av ti lektorar meinar krava til dokumentasjon og rapportering går ut over undervisninga og kvaliteten i skulen. Tid som elles kunne ha blitt brukt til følgje betre opp kvar einskild elev blir no brukt i eit unødvendig stort skjemavelde, skriv Hamre og Horn.
Venstre sitt landsmøte vedtok i helga å etablera eit breitt samansett regelråd med sikte på å redusera byråkratiet i skulen. Landsmøtet vedtok også eit mål om ei forenkling av læreplanverket, for å gjere kompetansemåla meir målbare.
– Vi må ha tru på at den einskilde lærar, rektor og skule veit best korleis læringa skal leggjast opp for å nå kompetansemåla, slår Venstre-politikarane fast.
