Kvar tredje barnehage har tilgang til nettbrett. No meiner ekspertar at alle barn må få tilgang til nettbrett i barnehagen for å jamne ut forskjellane.
Det er undersøkinga Barnehagemonitor frå Senter for IKT i utdanninga som viser at 29 prosent av barnehagane har tilgang til nettbrett. Senteret har no stor pågang frå barnehagetilsette som ønskjer opplæring i bruk av nettbrett og anna pedagogisk teknologi , skriv Aftenposten.
Medietilsynets Småbarn og medium-undersøking for 2014 viser at åtte av ti barn har tilgang til nettbrett heime. Delen barn som har eigne nettbrett aukar dessutan raskt, viser TNS Gallups undersøking Mediebarn 2014.
– Bruk av nettbrett i barnehagane kan vere med på å redusere skillet mellom dei som har og dei som ikkje har tilgang til nettbrett heime. Når ein kjem på skulen, kan det eigentleg vere for seint, seier Pia Lang-Holmen, som leier «Trygg Bruk» hos Medietilsynet.
Cathrine Fragell Darre, som er prosjektleiar i «Digital praksis i barnehagen» i Norlandia-barnehagane, peiker også på at den utjamnande funksjonen til barnehagane også kan gjelde for barna som har tilgang, men som primært spelar åleine heime.
– Det er noko ganske anna å erfare sosiale prosessar rundt spel og skapande verksemd i barnehagen, seier Darre. (©NPK)
