Leiar i Noregs Mållag, Håvard B. Øvregård, meiner det trengs raske tiltak for å betre tilbodet av nynorske læremiddel for vaksne som skal lære norsk, skriv Klassekampen.
– Vi vil ha ein intensiv innsats med ressursar og prioritering raskast mogleg. Ei straksløyving på tre millionar ville monna. Mange kommunar ønskjer å gi opplæring på nynorsk, men synest ikkje undervisingsmateriellet er godt nok. Her trengst også tilbod om fagleg støtte til lærarane som skal stå for opplæringa, seier Øvregård.
Han etterlyser politisk vilje til å få dette til.
– Stat og kommune har ansvaret. Det burde stillast same krav om parallellutgåver av lærebøker for vaksenopplæringa som for grunn- og vidaregåande skole, slår Øvregård fast.
