Fjærland får prisen «Iderike bygder» 2010. Grunnen er at dei gir rom for tilflyttarar og nye idear og har vist seg som ei kreativ bygd i lang tid, heiter det i grunngjevinga til juryen.
– Fjærland har over lang tid vist seg som ei kreativ og nyskapande bygd i Sogn og Fjordane, skriv Sogn og Fjordane fylkeskommune i ei pressemelding om pristildelinga. Det er òg fylkeskommunen som deler ut prisen.
Turismen har lange tradisjonar i Fjærland, og det er noko av forklaringa på at bygda gir rom for tilflyttarar og nye idear. Døme på nyskapande prosjekt er Bremuseet og Bokbyen. I tillegg har dei skipa Rundballefestivalen, som fokuserer på kunst og kultur.
Prisen er eit diplom og ein pengesum på 30.000 kroner. Prisen blir delt ut på fylkestingsmøtet 14. desember. (NPK)
