Det var fleire nynorske bøker blant vinnarane av Kulturdepartementets barne- og ungdomsbokprisar.
I alt åtte forfattarar, illustratørar, teikneserieskaparar og omsetjarar fekk prisane for barne- og ungdomslitteratur utgitt i 2012. Det var kulturminister Hadia Tajik (Ap) som delte ut prisane onsdag. Mellom dei var Kenneth Steven (forfattar) og Øyvind Torseter (illustratør), som fekk prisen for beste biletbok for barn med boka «Historia om korleis hunden fekk våt snute”.
Historia er ei livleg attgjeving av den gamle fabelen om korleis hunden fekk snute. Då vatnet flomma over landet, bygde Noah ein svær ark og tok om bord småkryp, husdyr og ville dyr av alle slag. Men medan dei er ute på havet, spring båten lekk.
Guri Vesaas fekk omsetjarprisen for boka «Rosas buss”, som ho har omsett frå italiensk. Boka handlar om rasisme og mot til å kjempe for rettane sine med utgangspunkt i historia om Rosa Parks, som nekta å gi frå seg bussetet sitt.
Litteraturprisen gjekk til Arne Svingen med «Sangen om en brukket nese”. Jon Ewo fekk Fagbokprisen for boka «Norske konger og dronninger”. Debutantprisen var det Marianne Kaurin som fekk, med boka «Nærmere høst”. Trond Bredesen fekk Illustrasjonsprisen for illustrasjonane i serien «Kunstdetektivene” av Bjørn Sortland, og Lene Ask fekk prisen for beste teikneserieroman for «Neste gang blir alt riktig”.
For bokåret 2012 var i alt 23 forfattarar, illustratørar, omsetjarar og teikneserieskaparar nominert til i alt sju priskategoriar: Litteraturprisen, Bildebokprisen, Fagbokprisen, Debutantprisen, Illustrasjonsprisen, Oversetterprisen og Tegneserieprisen. (NPK)
