I Hordaland, Sogn og Fjordane og Rogaland seier eit fleirtal nei til planane om ein vestlandsregion.
Ei meiningsmåling gjort av Sentio Research for NRK viser at 51 prosent av dei spurde i Hordaland ønskjer å bli verande i eit eige fylke som i dag. 10 prosent svarer veit ikkje, medan 39 prosent seier ja til å slå seg saman med eitt eller fleire av nabofylka.
Skepsisen er størst i Rogaland, der 57 prosent seier nei, 10 prosent veit ikkje, og 33 prosent seier ja til samanslåing.
I Sogn og Fjordane ønskjer 52 prosent å bli verande i eit eige fylke som i dag, 6 prosent veit ikkje, medan 41 prosent er for ei samanslåing.
– Resultatet er betre enn eg hadde forventa, seier Hordalands fylkesordførar Anne Gine Hestetun (Ap).
– Nesten 50 prosent seier jo at ein vestlandsregion er noko dei kan leve med, seier ho. (©NPK)
