Innbyggjarane i 47 kommunar stemte måndag over om dei vil slå seg saman med nabokommunane. Så langt er det berre fleirtal for samanslåing i ti kommunar.
I 35 kommunar har fleirtalet stemt mot samanslåing, mens resultatet frå to av kommunane enno ikkje er klart.
Fleire stadar i landet samla innbyggjarar seg for å feire resultata.
– Vi skal feire til det lysnar av dag, men ikkje hovere, seier Odd Arne Brekstad og Mikal Tyskø til Fosna-Folket. Dei er del av ein gjeng samanslåingsmotstandarar som samla seg på utestaden BarRock etter at det vart klart at folket i Ørland sa nei til å slå seg saman med nabokommunen Bjugn.
Naboane i Bjugn – som i 2014 sa nei til å slå seg saman med Ørland – stemte måndag for ei samanslåing.
Nei til storkommune i Rogaland
I forkant av supermåndagen var det særleg knytt stor spenning til resultata frå Sandnes, Stavanger og Sola, der innbyggjarane skulle ta stilling til om dei vil gå saman om den nye storkommunen Nord-Jæren.
Denne planen verkar no mindre sannsynleg etter at Stavanger stemte ja, men Sola og Sandnes stemte nei. I Stavanger er dei skuffa over at nabokommunane sa nei, og ordførar Christine Sagen Helgø (H) rettar no blikket nordover.
– Vi kjem til å jobbe vidare med dei som vil snakke med oss, altså Finnøy og Rennesøy, seier ho til NRK. (©NPK)
