For knappe fire år sidan kom det nederlandske ekteparet Roskam til Ytre Sogn. Det tok ikkje lang tid før dei vart lokka med på Nynorske litteraturdagar.
– Eg spurte dei i fjor òg, men då hadde dei ikkje tid, seier Oddbjørg Stølen og hikstar ein hes latter medan ho ser på venninna i sofaen attmed seg.
– No vart vi endeleg med, og vi har verkeleg storkost oss med bøkene, kulturen og sceneshowet, repliserer nederlandske Yvonne Roskam. Oddbjørg og Yvonne vart kjende med kvarandre då dei byrja å arbeide i lag, ei lita stund etter at ekteparet Roskam først kom til Sogn. No er dei vortne gode venninner, og latteren sit laust i veggane. Saman har dei teke turen for å få med seg jubileumsåret for nynorske litteraturdagar.
– Det er verkeleg eit flott arrangement, med eitt breitt kulturtilbod, seier Yvonne og ektemannen Cornelius.
Forstod komikaren
Sjølv om ekteparet frå Nederland byrjar å få taket på språket etter fire år i landet, får dei ikkje alltid med seg alt om det går fort for seg på dialekt. Men då humorkongen frå Fjordane, Roy Aron Myklebust, stod på scena, forstod dei nærast absolutt alt. Frå sofaen i lokalet der Myklebust hausta enorme latterkuler og trampeklapp, kan gjengen frå ytre Sogn skimte helten sjølv, der han står og ryddar opp etter showet.
– Vi må berre ta bilete av han med ein gong. Han var jo heilt genial, fniser nederlandske Yvonne Roskam og peiker på komikaren.
Komikaren avslår ikkje fotoførespurnaden, og saman får dei foreviga seg med komikaren dei verkeleg forstod seg på.
