Nyhende- og debattavisa for unge, Framtida.no, har fått 20.000 frå Eurodesk til å utvikla ei temaside for internasjonal studie- og jobbutveksling for ungdom.
På denne temasida skal ein samla lenkjer til dei viktigaste nettstadane for internasjonal utveksling, laga artiklar og reportasjar om ungdom som er på utveksling i Europa og andre forbrukarsaker om utveksling. No søkjer Framtida.no etter elevar og studentar som er på utveksling i Europa til å blogga om korleis det er å studera ute.
– Så vidt me kjenner til finst det i dag lite, om noko i det heile, internasjonal ungdomsinformasjon på nynorsk. Tiltaket vårt vil gjera noko med dette, og gjennom Framtida.no meiner me at informasjonen som me vil samla, vil nå breitt ut til ungdom, seier Svein Olav Langåker, prosjektleiar i Framtida.no.
Eurodesk er ein del av EU-programmet Aktiv Ungdom, og tilbyr informasjon om studier, stipend og jobb i Europa.
