Fagforbundet og Landssamanslutninga av nynorskkommunar (LNK) underteikna
tysdag ein samarbeidsavtale for dei neste fem åra.
Avtalen inneber at språkkursa til LNK framleis kan vera gratis for kommunetilsette. Dessutan inneber avtalen at LNK får høve til å gje viktig økonomisk støtte til nyhende- og debattavisa for unge, Framtida.no, nettidsskriftet for ungdom, Magasinett, og kulturavisa for barnehage og småskule, Pirion.
Leiar i Fagforbundet Jan Davidsen seier dette om kvifor dei støttar arbeidet til LNK:
– Folk tar for lett på kor viktig identiteten vår er. Det er ingenting som identifiserer folk meir enn språk når ein ikkje lenger bryr seg med utsjånaden til folk. Som organisasjon er noko av det viktigaste ein kangjera å underbyggja identiteten til medlemmane våre.
Davidsen legg til at det er viktig for Fagforbundet å visa at ein gjer noko for medlemmane i heile Noreg.
– Å utvikla normer og respekt for den språklege identiteten er viktig. Å vera trygg på eigen identitet er viktig for sjølvkjensla og likeverd, understrekar han.
– Det er ikkje så stor forskjell på å jobba for faglege rettar og språklege rettar, legg Vidar Høviskeland til. Han held fast at avtalen vil styrkja arbeidet til LNK dei neste fem åra.
