Framtida.no får 100.000 frå Fritt Ord til prosjekt om glokal journalistikk om klimaspørsmål.
Pengane skal gå til artikkelseriar om det grøne skiftet og om klimaspørsmål i lokalvalet.
– Dette er ei strålande stadfesting for oss at Fritt Ord har tru på det me driv med, og veldig kjekt at me når opp blant så mange andre gode søkjarar. No gler me oss til å setja i gang, seier redaktør i Framtida.no, Svein Olav B. Langåker. Målet med prosjektet utforska nye metodar for å skriva om eit globalt spørsmål som klima før lokalvalet.
Inspirert av slagordet «tenk global, handla lokalt» vil Framtida.no forsøka å knyta globale og lokale problemstillingar saman for å gjera klimaproblemet meir konkret.
– Me ønskjer å laga såkalla glokal journalistikk på klimaspørsmål i nokre av dei norske lokalsamfunna som er mest avhengig av oljeindustrien. Slik vil me prøva å undersøkja kva berekraftige løysingar me skal leva av i framtida, seier Langåker.
Framtida.no-redaksjonen vil la publikum vera med og påverka retninga og innhaldet i journalistikken.
– Difor vil me også arrangera eit folkemøte i samband med prosjektet, seier redaktøren for den nynorske nettavisa.
Fritt Ord delte i dag ut vel fem millionar kroner til 32 ulike journalistiske prosjekt, som ein del av stiftinga si satsing på å støtta kvalitetsjournalistikk.
Den nynorske nettavisa Framtida.no blir driven av Landssamanslutninga av nynorskkommunar i samarbeid med ABC Startsiden.
