Regjeringa meiner satsinga på havvindkraft aukar ved å bruke 40 millionar kroner meir til føremålet. Ein dråpe i havet, meiner Framstegspartiet og Bellona.
Regjeringa foreslår i statsbudsjettet å løyve 40 millionar kroner til å utvikle fornybar energiproduksjon til havs. 30 millionar av dette skal brukast på uttesting av pilot- og demonstrasjonsprosjekt. 10 millionar skal brukast på å kartleggje gode område for havvindkraft.
– Regjeringa prøver å gje eit inntrykk av at den satsar, men det er ikkje mogleg å realisere noko for ein så låg sum, seier energipolitisk talsmann i Frp Ketil Solvik-Olsen til Nationen. Han viser til at det kosta 400 millionar kroner å byggje Statoil si havvindmølle Hywind.
– Å late som om 40 millionar kroner er ei god satsing, er difor berre ein vits, seier han.
Bellona er samd.
–30 millionar held ikkje til mange turbinar. I den samanheng blir summen nærast ubetydeleg. Dersom Noreg har ein ambisjon om å liggje fremst i denne utviklinga, må potten mangedoblast i åra framover, seier energi- og klimarådgjevar Håvard Lundberg i Bellona.
Olje- og energiminister Terje Riis-Johansen (Sp) avviser at satsinga er liten.
– Det er første gong ei regjering i Noreg satsar såpass mykje på havvindprosjekta. I motsetnad til tidlegare, skjer det verkeleg noko no. Vi skal utvikle teknologi som gjer vindkraft billegare. Vindkraft skal bli stort også på land, men det verkeleg store vindkrafteventyret i Noreg vil komme offshore, seier han. (©NPK)
