Tre unge, talentfulle festspelforfattarar har selskap av mellom andre Vamp og Are Kalvø i eit festspelprogram som strekkjer seg både over landegrenser og norske språkgrenser i jubileumsåret for Ivar Aasen.
– I samband med 200-årsjubileet for Ivar Aasen, ser vi fram til å feire både historia og den nynorske framtida, seier programansvarleg Karine Munch i Ivar Aasen-tunet.
Årets tema, Grenselaust, er inspirert av Språkåret 2013, ei nasjonal feiring av alle språk i Noreg, med bakgrunn i Ivar Aasen sitt 200-årsjubileum. Ivar Aasen og Språkåret er synlege i mange programpostar. Språkforskar Arne Torp forklarar kvifor Noreg er dialektparadiset i årets minneforedrag, og Ottar Grepstad held det femte og siste foredraget i serien «Dette er Ivar Aasen». Språkforskarar og forfattarar diskuterer nynorsk og bokmål, omsetjing og dialektar. I Språkåret blir både opningshøgtida og festspelgudstenesta tolka for døve. Festspeldiktarar I år kan ein møte tre unge festspeldiktarar. Lars Petter Sveen, Guri og Sigrid Sørumgård Botheim skal møte publikum på ulike arenaer og i ulike roller. Kjartan Fløgstad er laurdag i samtale med Lars Petter Sveen. Forfattaren Jóanes Nielsen frå Færøyane, som er nominert til Nordisk råds litteraturpris 2013 for boka Brahmadellane, kjem til Festspela saman med mellom andre Ingrid Storholmen, Atle Berge og Sunniva Relling Berg. Vamp er hovudattraksjon på Uteamfiet laurdag kveld. Hekla Stålstrenga frå Nord-Noreg gir publikum sin særeigne lyd, heklamusikken. Gjertrud Jynge og Pål Christian Eggen frå Det Norske Teatret presenterer høgdepunkt frå 60 år med musikalhistorie. Henning Sommerro rundar av årets Festspel med Neonlys på Ivar Aasen saman med Siv Aurdal under Aasen-stemnet søndag ettermiddag.
Årets stemnetalar er Are Kalvø, som er aktuell med NRK-serien og boka Ny grunnlov. Meir for born og unge – I år er vi glade for å kunne presentere fleire nye arenaer for born og unge. Med boka til Atle Berge, «Keeperkongen», kombinerer vi litteratur og idrett på Volda stadion, seier Munch. I forkant av Festspela blir det arrangert både ein skrivekonkurranse og ein dokumentarfilmverkstad. Ein ny programpost for dei yngste i år er Festspelboka for born. Dei nynorske festspela er ei årleg feiring av den nynorske skriftkulturen og blir arrangerte i Ørsta og Volda siste helga i juni kvart år. I år skjer dette frå torsdag 27. juni til søndag 30. juni. Programmet inneheld meir enn 40 arrangement, for alle aldersgrupper. (NPK)
