Hanne Bergheim tok imot Øyo-stipendet på 20.000 kroner under avviklinga av musikkfestivalen på Stord laurdag kveld.
– Juryen trekkjer fram Bergheim som ein dyktig låtskrivar og god tekstforfattar, ein god liveartist med ein særprega vokal, og at ho syng på nynorsk, skriv festivalleiar Alf H. Aronsen i ei pressemelding.
Øyo-stipendet blei delt ut av Øyo, Sparebanken Vest og Mediehuset Sunnhordland.
– Stipendet skal gjera det mogleg for unge, uetablerte artistar i Sunnhordland å komma seg ut for å dela musikken sin med eit større publikum. Stipendet skal brukast til turnéverksemd, står det i meldinga, ifølgje avisa Sunnhordland.
I juryen var det representantar frå Øyo, Sparebanken Vest, Mediehuset Sunnhordland og Stord-musikar og forfattar Roald Kaldestad.
I grunngjevinga står det følgjande:
“Det har vore ei todelt oppleving å vera med i juryen for årets Øyo-stipend. For det første har det vore gledeleg å høyra at unge sunnhordlendingar lagar så mykje god musikk. Det skal me vera stolte over. Samstundes har det gjort juryarbeidet vanskeleg – alle kandidatane hadde fortent eit stipend slik at fleire kan få glede av musikken deira.
Me i juryen meiner likevel at ein av kandidatane skil seg ut ved å scora sterkt på alle kriterium. Det er ei glede for oss å kunne overrekkja Øyo-stipendet 2012 til bømlingen Hanne Bergheim.”
I år hadde fem artistar søkt stipendet: Nils Horn, Aina Hatlevik, Stine Larsen, Hanne Bergheim og gruppa Evolver.
Wikipedia skriv følgjande om Hanne Bergheim: Hanne Bergheim (fødd 26. juli 1986) er ein norsk musikar, biletkunstnar og tekstforfattar frå Bømlo, busett i Bergen. I starten av si musikalske karriere var ho mest aktiv innan teater og musikalar, men ho er i størst grad kjent frå duoen List saman med fiolinist og vokalist Ella Helèn Bukkøy.
I 2008 gav List ut EPen «Excuse me while I disappear», i 2009 gav dei ut album og turnerte i Kina. I 2011 kom deira første album i norsk språkdrakt – der står Hanne bak sju av 12 låtar, i tillegg har List tatt i bruk materiale skrive av tekstforfattar Ingvar Hovland og hans kompanjong Asbjørn Stokkeland.
I 2010 blei Hanne Bergheim tildelt den første Kenneth Sivertsen-prisen for unge musikarar.
I 2011 blei ho aktuell med multimediaverket Tilstandar som vart utabeid i Beijing. Utstillinga blei halden i Moster Amfi april-mai 2011.
