Kommuneorganisasjonen KS valde tysdag Gunn Marit Helgesen (H) til ny styreleiar. Ho blir den første kvinnelege leiaren i organisasjonen.
Helgesen er 53 år gammal og kjemiingeniør av utdanning. Ho var fylkesordførar i Telemark frå 2003 til 2011, etter to periodar som fylkesvaraordførar. I dag representerer ho Høgre i Porsgrunn bystyre.
Ho overtar stillinga som KS-leiar etter Halvdan Skard (Ap).
Mette Gundersen (Ap) frå Vest-Agder blir 1. nestleiar i organisasjonen og Bjørn Arild Gram (Sp) frå Nord-Trøndelag blir 2. nestleiar.
Heile leiinga blei valt samrøystes, ifølgje ei pressemelding frå KS.
Styrkeforholdet i hovudstyret blir som tidlegare sju medlemmer frå kvar politiske blokk. (©NPK)
