Helse Fonna sender ut informasjon på bokmål, men lovar bot og betring etter tilsnakk frå Språkrådet. Det skulle berre mangla, skriv Sunnhordland på leiarplass.
– Dei fleste kommunane i helseføretaket sitt nedslagsfelt er nynorskkommunar. Blant dei som reagerer er Velaug Byrkjeland, som sjølv jobbar på Stord sjukehus, og som i lang tid har irritert seg på at Helse Fonna sender ut informasjon til alle pasientar på bokmål. Grunnen er at det blei innført eit felles system med bokmålsmalar i helseføretaket. Helse Fonna, som er ein del av Helse Vest, er forplikta til å bruka nynorsk sidan brorparten av kommunane i regionen nyttar nynorsk som målform, skriv Sunnhordland.
Etter fleire interne rundar hamnar saka hjå Språkrådet. Resultatet er at Språkrådet no ventar at Helse Fonna går gjennom rutinene for målbruk for å sikre at reglane blir følgde i framtida.
– Dette er slett ikkje noka ny problemstilling. Me høyrer stadig vekk om offentlege føretak som får seg ein språksmekk. Det er på sin plass. No må også politiet skjerpa seg. Og det er slett ikkje alltid departementa, som skal syta for at lovar og reglar vert haldne, klarar å overhalda mållova. Då kan ein kanskje ikkje forventa at andre klarar det. Våren 2010 sende nynorskkommunen Fjell på Sotra 13 brev til ulike departement. Alle svar var på bokmål, skriv lokalavisa.
