Store skilnader på kor mye den einskilde av oss må betala i avgifter for blant anna vatn og renovasjon.
Gjemnes kommune i Møre og Romsdal har dei høgaste kommunale avgiftene i landet. Foto: Halvard Hatlen/Wikipedia/CC-BY-SA-3.0-lisens
– Då me utførde kåringa i fjor var skilnaden mellom den dyraste og billegaste kommunen rundt 15.000 kroner. I år ser me at skilnadene har blitt endå litt større, seier Reid Krohn-Pettersen, sjeføkonom i Norsk Familieøkonomi.
Kåringen er basert på reviderte Kostra-tal som blei publisert av SSB måndag formiddag.
Ikkje alltid best å vere billegast
I undersøkinga er det lagt vekt på kva innbyggjarane må betala for kommunale avgifter som vatn, avløp, renovasjon og feiing. I tillegg har Norsk Familieøkonomi sett på kor mykje ein gjennomsnittleg husstand på 120 kvadratmeter må betala i eigedomsskatt.
– Blant kommunane som har levert inn fullstendige tal kjem Sola kommune i Rogaland ut som den billegaste kommunen i Noreg, medan Gjemnes i Møre og Romsdal er den dyraste. Dette er ein rein reprise på topp- og botnplasseringa frå i fjor, men no har skilnaden mellom dei to kommunane blitt endå ein tusenlapp høgare. Skilnaden er heile 15.925 kroner. Forbrukarane føler seg ofte makteslause når kommunale avgifter og skattar stadig blir auka, men alle har ei viss påverknadskraft gjennom val av politikarar, seier Krohn-Pettersen i ei pressemelding.
Det er viktig å hugsa på at høgare avgifter i nokre tilfelle heng saman med fornyingar i eksempelvis vatn- og avløpsnett, noko som sjølvsagt kjem innbyggjarane til gode. Sist sommar stod sjeføkonomen i Norsk Familieøkonomi sjølv med kjellaren full av vatn på grunn av ein gammal vassleidning i Sola kommune. Kommunen blei som kjent kåra til Noregs billegaste òg i undersøkinga til fjoråret.
– Billegast er ikkje nødvendigvis alltid best, smiler Reid Krohn-Pettersen.
