Når Nord-Aurdal kommune slår saman barneskulane og flyttar dei inn til sentrum, så tar dei og bøkene med seg. – No jaktar vi på nye, gode nynorskbøker, seier rektor for den nye skulen som kjem til Ulnes.
Kommunen skal slå saman seks barneskular til ein stor skule i Fagernes, noko ein del av foreldra i Ulnes ikkje vil vere med på. Dei har no stifta ein montessoriskule som skal opne til hausten, med rundt 40 elevar.
– Vi arvar ein del skulebøker og kopioriginalar etter skulen som legg ned, men skjønnlitteraturen får vi dessverre ikkje, seier rektor Kirsten Inga Kamrud, som ikkje har problem med å forstå at kommunen vil ta med seg det dei eig. Men den nye skulen har lyst til å halde på eit godt og innarbeidd språk og leitar no med lys og lykte etter nye bøker. I helga sendte dei derfor ut e-post til forlag og organisasjonar med bøn om bok-gåver frå dei som har noko å gi. Kva respons dette gir, veit ikkje rektoren enno, det har trass alt vore høgtidshelg. Men ho har god tru på at Ulnes Montessoriskule skal kunne halde gode språktradisjonar i hevd.
– Vi har bestandig lagt vekt på dette i skulen her, seier Kamrud.
– Her snakkar vi valdresdialekt, ei dialekt som er nærare nynorsk enn bokmål. Når vi les bokmålsbøker, set vi om til vår eiga dialekt medan vi les. Kvart år har vi dialekt-veke i skulen.
Sjølv meiner ho elevar som har lært seg nynorsk på skulen har eit stort føremon. Dei er sterkare rusta, då dei har lært eit språk dei ikkje får inn frå så mange andre kanalar, meiner ho.
– Bokmål lærer dei uansett.
Montessoriskule:
En montessoriskule er ein privat skule som underviser med basis i pedagogikken til den italienske legen Maria Montessori.
Pedagogikken er basert på barnas eigenverdi, læring utan negative inntrykk, og at elevane sjølve skal søke etter kunnskap.
(Kjelde: Wikipedia)
