Finansminister Siv Jensen (Frp) seier at regjeringa framleis jobbar med EU for å endre det nye regelverket for redusert arbeidsgjevaravgift.
– Vi er framleis i dialog med ESA for å avgrense sektorunntaka. I tillegg jobbar vi med tiltak i revidert statsbudsjett som ikkje kjem i strid med regelverket for statsstøtte, sa Jensen i spørjetimen i Stortinget onsdag.
Ap-representant Lisbeth Berg-Hansen viste til at det får verknad for 42.000 arbeidsplassar når dei EU-reglane for regionale støtteordningar blir endra frå 1. juli. Etter den datoen blir det ulovleg med redusert arbeidsgjevaravgift i sektorar som transport, energi og finans.
Leiaren i finanskomiteen Hans Olav Syversen (KrF) sa at tiltak i revidert er heilt nødvendig og spurde om det blir kompensasjon krone for krone på bedriftsnivå eller på sektornivå.
– Regjeringa jobbar ikkje i eit vakuum. Vi må jobbe både vidt og kanskje også litt utradisjonelt, varsla Jensen.
I spørjetimen for ei veke sidan sa statsminister Erna Solberg (H) at ho ikkje kan garantere at bedriftene får refundert alle ekstrautgiftene, sjølv om planen til regjeringa er å tilbakeføre alle midlane ho får inn ekstra. (©NPK)
