Ekspertutval vil foreslå at kommunane bør ha minst 20.000 innbyggjarar. I så fall er det berre éin nynorskkommune med mange nok innbyggjarar.
Ekspertutvalet til regjeringa kjem til å foreslå at norske kommunar bør ha minst 20.000 innbyggjarar, ifølgje Stavanger Aftenblad. Det tyder at kvar tredje kommune i Rogaland vil vere for liten.
Utvalet skal måndag i neste veke leggje fram konklusjonane om korleis kommunestrukturen i Noreg bør sjå ut. Men ifølgje ein lekkasje frå utvalet, går utvalet inn for at det bør vere minst 20.000 personar i ein kommune.
For Rogaland betyr det at kvar tredje kommune, slik situasjonen er i dag, vil vere for liten, skriv avisa.
Ordførar Bjørn Kars (H) i Randaberg kommune har sete i ei ordførargruppe som har levert innspel til ekspertutvalet. Han vil ikkje seie anna om konklusjonane enn det som gjeld storleiken på kommunane.
– Utvalet kjem til å lande på at kommunane bør ha minst 20.000 innbyggjarar, seier Kars.
Han trur dokumentet som blir lagt fram måndag, kjem til å setje ny fart i debatten om kommunegrensene.
Av nynorskkommunane er det berre Fjell kommune som i dag har over 20.000 innbyggjarar.
