Lølandmarkeringa får 180 000 kroner frå departementet til innspurten i 2011.
Det var stortingsrepresentant Geir Pollestad (Sp) som kunne gi gåva til Roy Høibo ved Ryfylkemuseet. Tidlegare kom markeringa inn i statsbudsjettet med ein merknad, og no kjem det altså midlar frå departementet.
Samstundes går arbeidet med å etablere eit nasjonalt barnekultursenter på Sand vidare. Og Pollestad legg vekt på at denne summen på 180 000 kroner ikkje er den endelege løyvinga, men eit skritt på vegen.
Brevet med pengelovnaden vart sendt til museet fredag, og for direktør Roy Høibo er pengane kjærkomne. Museet held på å planleggja ei opplevingsutstilling for barn, basert på boka Kvitebjørnen av Løland. Denne utstillinga opnar 27. april i samband med at LNK skal halde sitt landsting i Suldal, skriv Suldalsposten.
