Kommunal- og moderniseringsdepartementet har gitt kommunane Sandefjord, Andebu og Stokke lov til å slå seg saman utan å halde val på nytt kommunestyre. Det er ulovleg, slår jussprofessor Jan Fridthjof Bernt ved Universitetet i Bergen fast.
Dei tre kommunane i Vestfold blir frå 1. januar 2017 éin, men det skal skje utan nytt val. I staden skal kommunestyra sjølve setje saman det nye kommunestyret.
– Det går ikkje an. Det finst berre éin måte å velje eit nytt kommunestyre på, og det er ved eit val der alle røysteføre for stemme, seier Jan Fridthjof Bernt til Klassekampen.
Ettersom samanslåinga er den første i kommunereforma, fryktar Bernt at framgangsmåten kan skape presedens. Han undrar seg stort over framgangsmåten til Kommunal- og moderniseringsdepartementet.
– Vi må hurtig få ei god forklaring på kvifor departementet meiner det har kompetanse til å fastsetje og samtykke til val som så klart strir mot det som står i vallova og kommunelova om val til kommunale organ, seier Bernt. (©NPK)
