No bør kommunane gripe sjansen og sikre seg ingeniørar frå oljebransjen, meiner fagforeininga NITO.
For tida er det nedgangstider i oljebransjen og fleire mistar jobben. Fagforeininga NITO oppmodar derfor kommunane til å vere på offensiven og rekruttere ingeniørar som blir overflødige, skriv NRK.
Det har i fleire år vore stort behov for ingeniørar i det offentlege og ute i kommunane, men få nyutdanna søkjer seg hit. Oljeindustrien har lokka meir, i alle fall fram til no.
– No har det offentlege sjansen til å knyte seg til attraktiv kompetanse som er overtalig i andre bransjar, seier avdelingsleiar i ingeniørorganisasjonen NITO i Møre og Romsdal Tom Rian til NRK.
Han peikar på at sjølv om løna ofte er langt dårlegare i det offentlege, så finst det andre attraktive gode som betre regulerte arbeidsdagar og mindre overtid. (©NPK)
