Post- og teletilsynet (PT) har fått 171 søknader på til saman 713 millionar frå kommunar som ønskjer å byggje ut breiband i grisgrendte strøk.
Søknadene kjem frå 16 fylke. Nordland søkjer om heile 131 millionar kroner. Den totale kostnadsramma for dei aktuelle breidbandsprosjekta som det blir søkt om statleg støtte til, ligg på 1,3 milliardar kroner.
PT har likevel ikkje meir enn 160 millionar kroner å dele ut til slike prosjekt i 2014, og behandlinga av søknadene har no starta.
Breibandsstøtteordninga skal finansiere breibandsutbygging i område der dei kommersielle aktørane ikkje meiner det er lønnsamt å byggje.
På heimesidene til Post- og teletilsynet ligg det ute ei landsdekkjande oversikt over dei planlagde breibandsprosjekta. Denne oversikta blir fortløpande oppdatert. (©NPK)
