Elevar har rett til opplæring og skuleelevar som gjer det dårleg på eksamen etter lærarstreiken, kan saksøkja kommunane, seier jussekspert.
I dag er over 100.000 elevar i Noreg ramma av lærarstreiken og titusenvis har ikkje eingong fått starta på skuleåret, ni dagar etter offisiell skulestart.
Stipendiat Trond-Erik Welstad ved Det juridiske fakultet ved Universitetet i Oslo, er spesialist på utdanningsrett og seier desse elevane har ein heilt soleklar rett på å få tilbake undervisninga dei har tapt som følgje av streiken, skriv Bergens Tidende.
Skjer ikkje det, meiner Welstad at streiken kan føra til søksmål mot kommunar og fylkeskommunar.
– Viss streiken fører til at avgangselevar stryk eller får dårleg karakter på eksamen og difor ikkje kjem inn på eit studium, kan elevar eller føresette føra erstatningssøksmål mot skuleeigaren for tapt inntekt seinare i arbeidslivet, seier Welstad.
Elevar har rett på opplæring ifølgje Opplæringslova, der det også er fastsett kor mange timar elevane har rett på. Skoleeigarane – kommunane og fylkeskommunane – har plikt til å syta for at dette timetalet er oppfylt.
– Utgangspunktet er altså veldig enkelt. Når elevane ikkje får det dei rettmessig skal ha, må det kompenserast på ein eller annan måte, seier Welstad. (©NPK)
