Leiar Sigmund Løvåsen i Den norske Forfatterforening har fått æra av å opne Olav H. Hauge-senteret torsdag 4. september.
Til opninga kjem gjester frå heile landet, og no gjer Ulvik bygdekvinnelag seg klar til å servere mat til både fastbuande og tilreisande gjester.
– I kraft av diktinga si var Olav H. Hauge ein av dei fremste medlemene i Den norske Forfatterforening. Medlemskortet hans ligg i Olav H. Hauge-senteret, og det kjennest veldig rett at det er leiaren for alle norske forfattarar som opnar det senteret som har fått namn etter Hauge, seier dagleg leiar Geir S Netland.
Sigmund Løvåsen (fødd 1977) debuterte i 2003 med romanen «Nyryddinga», som han fekk fleire store litterære prisar for. No er han leiar i Den norske Forfatterforening på tredje året.
Mat til alle
Opningshøgtida samlar folk frå heile landet. Den grøne kafé er open, men arrangørane reknar med så mykje folk at dei har invitert Ulvik bygdekvinnelag til å selje mat og drikke. – I Ulvik stiller folk opp når det trengs, og dette er bygdekvinnelaget eit godt døme på, seier Geir S. Netland.
Opningshøgtida for Olav H. Hauge-senteret torsdag 4. september tek til kl. 16.00 og varer ein time. – Vi bed om at folk er på plass i god tid, så går ingen glipp av det som skjer dei første minutta, seier Netland. – Kl. 17.30 opnar vi dørene til utstillinga for alle med gratis inngang, og i den nye museumsbutikken har vi fleire spesialtilbod, så set av dagen, folkens! oppmodar leiaren ved Hauge-senteret før han tek ein ny telefon.
