Kulturrådet ønskjer å styrkje samarbeidet med kunnskapskjelder som Wikipedia og Store Norske Leksikon. Dei har allereie etablert eit samarbeid med Wikimedia og er i kontakt med Store Norske Leksikon for å utvikle liknande samarbeid.
Målet med samarbeidet er å kople informasjon i ulike formidlingstenester som arkivportalen.no, digitaltmuseum.no, digitaltfortalt.no og europeana. eu saman med innhald i Wikipedia. På den måten håpar Kulturrådet å bidra til meir bruk av nettsidene, og at tema som gjeld arkiv, museum og kunst blir meir kjent blant brukarane.
Kulturrådet gir støtte til utgifter i samband med kursa, avgrensa oppover til kring 25.000 for kvart kurs. Slike utgifter kan vera leige av lokale og utstyr til å halda kursa, mat/servering, reise og opphald for kurshaldar, og andre utgifter knytt til kurset.
Under kursa vil erfarne kurshaldarar frå Wikimedia Noreg presentera korleis Wikipedia fungerer, kva for reglar ein bør følgja på Wikipedia, og visa i praksis korleis ein redigerer.
– Me vonar at ein kan samordna seg og ta initiativ til slike kurs i alle fylka, seier Gunnar Urtegaard, seksjonssjef for E-kultur i Kulturrådet.
Søknad om støtte må sendast til Kulturrådet innan 20. juni 2012. (NPK)
