Kommunal- og moderniseringsdepartementet har fått laga ei innbyggjarundersøking til bruk ved kommunesamanslåing.
– Med dette verktøyet kan kommunane høyre kva som er viktig for innbyggjarane i arbeidet med kommunereforma, seier kommunal- og moderniseringsminister Jan Tore Sanner.
Departementet har fått utarbeidd ei innbyggjarundesøking som blant anna inneheld spørsmål om samanslåingsalternativ og kva som er viktig for innbyggjarane i reformarbeidet. Undersøkinga spør direkte om tenestene kommunen har og korleis desse vil bli påverka av kommunesamanslåing. Opplegget må tilpassast lokale forhold, og kommunane kan sjølv legge til spørsmål knytt til lokale behov.
Støtte til folkehøyring
– Dette vil gi kommunestyra eit betre vedtaksgrunnlag enn det som er mogleg i ei rådgivande folkeavstemming, seier Sanner.
Han påpeiker at dette gjer det mogleg for kommunane å spørje kva innbyggjarane meiner om velferdstenester som skular, barnehagar og sjukeheim.
Alle kommunar som går gjennom reformprosessen og gjer kommunestyrevedtak innan 2016, får utbetalt 100.000 kroner som støtte til informasjon og folkehøyring. Kommunane vel sjølv om dei vil bruke undersøkinga som metode for å høyre på kva innbyggjarane meiner. (©NPK)
