Kommunal-og regionaldepartementet vonar prisen Årets nynorskkommune kan motivere kommunane til å løfte fram nynorsk som administrasjonsspråk.
– Me håpar at prisen gjer fleire medarbeidarar i kommunen medveten på korleis dei bruker språket sitt. I kommunar som ligg i eit område med mange bokmålskommunar og er under språkleg press, kan prisen styrkje nynorskbruken, seier rådgjevar Solveig Kolsrud i departementet.
Utdeling av prisen Årets nynorskkommune 2013 blir i månadsskiftet september/oktober, og vinnaren mottek 100 000 kroner. Kolsrud legg også vekt på at prisen bidreg til å setje nynorskbruken i kommunane på dagsorden, og kan forhåpentleg inspirere andre kommunar til å arbeide med å bruke nynorsk meir aktivt.
– Hugs at god språkbruk i offentleg forvaltning er viktig for at innbyggjarane skal kjenne rettane sine og kunne delta i lokaldemokratiet.
Dei kommunane som kan søkje er nynorskkommunar som har gjort ein innsats på eit eller fleire av desse områda: aktiv bruk og synleggjering av nynorsk i kommunale planar, aktiv bruk av nynorsk i omdøme- og informasjonsarbeid. Dette kan vere heimesider, skriftleg informasjonsmateriell til innbyggjarane, opplegg for generell marknadsføring av kommunen, til dømes gjennom kurs og anna opplæring i nynorsk eller eigne retningsliner for nynorskbruk i kommunen. God målbruk blant tilsette, marknadsføring av nynorsk i kulturarbeid og kulturarrangement og tidleg nynorskinnsats i barnehagar og barneskule.
Føremålet med prisen er å stimulere til god nynorskbruk i kommunane. Søknadsfristen er 31. august 2013. Tidligare vinnarar er Stord kommune (2009), Seljord kommune (2010), Fjell kommune (2011) og Sogn og Fjordane fylkeskommune (2012). Det er kommunane og fylkeskommunane sjølve som søkjer om å bli med i konkurransen. Kommunar som har søkt tidlegare er velkomne til å søkje.
