Landssamanslutninga av nynorskkommunar, LNK, har avgjort at landstinget i 2025 skal arrangerast i Øygarden kommune.
Øygarden kommune vest for Bergen er med sine kring 40.000 innbyggarar verdas mest folkerike nynorskkommune. No har styret til LNK bestemt at landstinget i 2025 vert halde på Panorama Hotell & Resort i Øygarden den 3. og 4. juni.
Landstinget vert arrangert annakvart år.
Dagleg leiar i Nynorskkommunane (LNK), Svein Olav B. Langåker, seier at målet med landstinget er å laga ein framtidsverkstad for nynorsk i kommunane.
– Me gler oss til å arrangera landstinget vårt i verdas mest folkerike nynorskkommune, Øygarden.
Landstinget er ope for alle interesserte og samlar både folkevalde, kommuneleiing og tilsette frå dei 85 kommunane og tre fylkeskommunane som er medlemmer i LNK , i tillegg til fleire regionråd og interkommunale føretak.
Språkstyrking
Eit aktuelt tema for konferansedelen av programmet blir korleis ein kan styrkja nynorsk som eit bruksspråk i alle delane av kommunen, frå barnehage og skule til bibliotek, vaksenopplæringa og kommuneadministrasjonen.
– Øygarden kommune har tatt fleire grep for å styrkja arbeidet med nynorsk, og har utvist stor vilje til å få landstinget til kommunen. Eg ser fram til å samarbeida med Øygarden kommune om å laga til eit spennande og aktuelt program for landstinget til neste år, seier Langåker.
– Godt fagleg påfyll
Fungerande ordførar Anita Garlid Johannessen gler seg stort over at landstinget vert arrangert i Øygarden.
– Vi set svært stor pris på dette. Øygarden er ein bynær kommune som opplever at nynorsken er under press. Difor er det så viktig for Øygarden kommune å følgja opp språkbruksplanen med gode språktiltak. Dette gjeld både administrativt og ikkje minst i skule og barnehage. Eit landsting med godt fagleg påfyll er viktig og til inspirasjon for språkarbeidet i kommunen, seier Johannessen til nettsidene til Øygarden kommune. Ho har tidlegare engasjert seg i lokalt språkarbeid gjennom Sotra Mållag.
LNK er ein landsdekkjande organisasjon som skal arbeida for å skapa positive haldningar til nynorsk språk og kultur og for at kommunane og styresmaktene tek desse sakene opp gjennom sine planverk. LNK tek på seg å vera talerøyr for medlemene og spreia informasjon som styrkjer dialektane, nynorsk skriftspråk og dei kulturtradisjonane dette står for.
På dagtid dei to dagane i juni vert det aktuelle seminar og føredrag som er aktuelle for kommunal tilsette, politikarar og andre som er opptekne av språktema i det offentlege rom.
