Svein Olav Langåker (32) er tilsett som prosjektleiar i Ung til sinns – på nett.
– Dette er eit veldig spanande prosjekt som eg er glad eg har fått sjansen til å jobbe med, seier Svein Olav Langåker som i dag er nettansvarleg i Sunnhordland. Han tiltrer jobben som prosjektleiar i Ung til sinns – på nett innan 1. mars neste år.
Langåker legg vekt på at ABC Startsida er ein stor og tung aktør på nett som truleg kan gi den nye nettavisa ekstra trafikk. I tillegg meiner han arbeidsfeltet nynorsk og ungdom er veldig spanande, og myke av grunnen til at han søkte jobben. I tillegg til at han har ei stor interesse for utviklinga innan digitale medier.
Den planlagde nettavisa Ung til sinns – på nett skal sikre at nynorskbrukarar får eit betre tilbod på internett, og vil ha hovudvekt på regionale nyhendesaker og kulturstoff for og av ungdom. Meininga er at stoffet skal treffe ungdommen på deira premissar. Nettavisa er eit planlagt samarbeid mellom LNK, Nasjonalt Garborgsenter (Jærmuseet), nettidsskrifta Magasinett og Pirion, ABC Startsiden og Kulturdepartementet. Dessutan skal ti norske aviser levere journalistisk stoff til satsinga.
