Kommunesektoren har høgare fråvær enn både næringslivet og statleg forvaltning, og Sintef meiner omstilling er årsaka til det.
Omstilling har dei siste ti åra prega kommunane og gjort arbeidarane meir utsette for endringar. Dette er éin av grunnane til det høge sjukefråværet, meiner seniorforskar Tore Nilssen ved Sintef.
Ifølgje Vårt Land har kommunesektoren eit fråvær på 8,7 prosent, medan privat sektor har eit sjukefråværet på 6,7 prosent og statleg forvaltning 6,5 prosent.
Omstillingar har vore vanleg i det private næringslivet, og dei tilsette har derfor vore meir vane med at omstilling er ein del av kvardagen. Folk som søkjer jobb i kommunane har forventa at arbeidsplassen er tryggare og mindre utsett for endringar. Men no stemmer ikkje dette lenger, påpeiker Nilssen.
Høgast fråvær er det innan kommunale helse- og sosialtenester med 10,3 prosent. Hardt fysisk arbeid pregar fleire av yrka i denne sektoren, og det kan gi høgare fråvær, ifølgje Nilssen.
Arbeidsgivarorganisasjonen til kommunane, KS, meiner det er mange og samansette årsaker til det høge fråværet i kommunane, men støttar forklaringa til Nilssen om at omstruktureringar aukar fråværet.
– KS ser at omstruktureringane kan opplevast belastande på organisasjonen og vere ei årsak til sjukefråværet, slik det også er i andre sektorar, seier fagsjef Bente Stenberg-Nilsen i KS. (©NPK)
