Lasse Hansen er tilsett som ny administrerande direktør i KS, organisasjonen til kommunesektoren.
Hansen som i dag er rådmann i Fredrikstad kommune, startar i stillinga i slutten av juni.
– Dette er ei eineståande moglegheit for ein som er oppteken av kommunen som sjølve berebjelken i velferdsstaten. Gjennom åra som rådmann har eg fått stor respekt for den kompetansen som dei tilsette i KS sit på, og eg gler meg til å arbeide saman med både dei og dei tillitsvalde i organisasjonen, seier Hansen.
Han har vore rådmann i Fredrikstad sidan september 2008 og har tidlegare vore rådmann i Notodden kommune, kommunalsjef for samfunns- og kulturutvikling og rådmannsvikar i Porsgrunn kommune, byingeniør i Skien kommune og underdirektør i Miljøverndepartementet.
– Eg er svært godt nøgd med å ha rekruttert han til KS som administrerande direktør. Det er viktig for KS å ha ein toppleiar som har førstehandskjennskap til dei daglege utfordringane til medlemmene, seier styreleiar Gunn Marit Helgesen i KS. (©NPK)
