Transparency International Norge meiner at kontrollrutinane mot korrupsjon i norske småkommunar ikkje er gode nok.
Ein rapport frå EU som blei lagt fram i februar påviste at små kommunar er meir sårbare for korrupsjon enn større.
Sjølv om Noreg ikkje er evaluert i rapporten, får fleire andre nordiske land kritikk for manglande rutinar, og Transparency International trur ikkje det er betre stilt i Noreg, skriv Nationen.
– Vi veit ikkje om vi er betre enn Sverige og Finland. Men det er ingen grunn til å tru at korrupsjon ikkje kan skje i norske kommunar og fylkeskommunar – det har vi også fått bekrefta at det kan, seier Tor Dølsvik i Transparency International Norge
Ifølgje han er 24 personar i kommunesektoren dømde for korrupsjon i Noreg etter at straffelova i 2003 fekk eigne korrupsjonsavgjerder.
EU-rapporten slo fast at korrupsjon kostar EU 120 milliardar euro kvart år, og viser at faren for korrupsjon generelt er høgare på regionalt og lokalt nivå, fordi det der er færre og svakare kontrollsystem enn på nasjonalt nivå.
Ei undersøking kommunesektororganisasjonen KS gjorde blant leiarar i kommunesektoren i fjor, avdekte også at fire av ti kjente til at det var blitt framsett forslag om «usømelege fordelar» til kommunetilsette. (©NPK)
