Kommunane arbeider ikkje utan vidare betre med næringsutvikling berre dei blir større, viser ein ny forskingsrapport.
Det trengst i alle fall meir kunnskap for å kunne seie noko klart om dette, går det fram av rapporten «Brikker som manglar. Kunnskap om næringsrettet samfunnsutvikling om kommunestørrelse», som forskingsinstituttet Norut har laga på oppdrag frå Kommunal- og moderniseringsdepartementet.
– I dei undersøkingane vi har gått gjennom, ser vi ingen tydeleg samanheng mellom kommunestorleik og måten dei arbeider på, seier seniorforskar Elisabeth Angell i Norut til Nationen.
Rapporten stiller seg dermed tvilande til den klare konklusjonen ekspertutvalet for kommunereforma kom fram til i sluttrapporten sin i fjor, nemleg at ein kommune bør ha minst 15.000– 20.000 innbyggjarar for å kunne arbeide godt med næringsutvikling.
Norut-forskarane meiner at kunnskapsgrunnlaget er altfor spinkelt til å kunne trekkje så klare konklusjonar.
– Hovudbodskapen i undersøkinga vår er at det ikkje ser ut til å vere nokon store forskjellar i nærings- og samfunnsutviklinga i store og små kommunar, men vi manglar kunnskap for å kunne seie noko heilt sikkert, seier Angell.
Statssekretær Jardar Jensen (H) i Kommunal- og moderniseringsdepartementet seier i ein e-post til Nationen at Norut-rapporten ikkje går imot det som har komme fram tidlegare.
– I rapporten frå Norut blir det peika på at kapasitet kan vere ei utfordring. Større kommunar kan ha større fagmiljø og dermed leggje forholda til rette for at fleire personar i kommunane kan arbeide aktivt med næringsutvikling, seier Jensen. (©NPK)
