Guro Ljone (30) er tilsett som formidlar ved Olav H. Hauge-senteret i Ulvik.
Ljone kjem frå stillinga som dagleg leiar for musikkorganisasjonen AKKS i Bergen. Ho tek til i stillinga 1. oktober.
Som prosjektleiar for forprosjektet for Hauge-senteret 2009–10 har ho også relevant erfaring og kunnskap om Olav H. Hauge. Ljone har mastergrad i medievitskap og har prosjekt- og produsenterfaring frå Badnajazz på Vossajazz og Ulvik Poesifestival.
–Ved tilsetjinga av Guro Ljone får Hauge-senteret ein dyktig, strukturert og kreativ medarbeidar som vil bidra til å skapa eit levande og interessant program for ulike publikumsgrupper, seier dagleg leiar Geir S. Netland ved Hauge-senteret. Med denne tilsetjinga har Hauge-senteret dei fire stillingane som var målet då Nynorsk kultursentrum i 2011 tok på seg ansvaret for å byggje opp senteret.
Formidlaren skal utvikle det pedagogiske tilbodet til elevar, studentar og lærarar og vera med og utforma temautstillingar og programtilbod. Hauge-senteret skal formidla både Olav H. Hauge og vår tids lyrikk i mange former.
