Sjølv om innsatsen frå det lokale sjukehuset i Lærdal truleg redda liv etter å ha behandla omtrent 450 personar etter brannen i helga, må sjukehuset framleis kjempa for å unngå nedlegging.
Sjukehuset i Lærdal er nemleg føreslege nedlagt ei rekkje gonger dei siste ti åra og har vore gjennom både nedbemanning og reduksjonar fleire gonger, skriv Klassekampen. Det er to timar til nærmaste sjukehus.
– Argumentet om at lokalsjukehus ikkje er i stand til å ta seg av store akutte og alvorlege hendingar er endå ein gong motbevist. Kor mange gonger skal det vera nødvendig å dokumentera dette?, spør Bente Øien Hauge, leiar for lokalsjukehusaksjonen i Lærdal.
Statsminister Erna Solberg (H), som måndag var på besøk i den brannramma bygda, vil ikkje gje henne lovnader om at sjukehuset skal halda fram.
– Det er klart vi skal ha lokalsjukehus over heile landet. Her har sjukehuset fungert både som skadestove og som samlingsstad for lokalsamfunnet, var det einaste ho svarte då NRK konfronterte henne med nettopp framtida til lokalsjukehuset.
Forkjemparar for å ta vare på lokalsjukehusa får derimot støtte frå partiet Raudt.
– Det dei fekk til i Lærdal, er ingenting anna enn ei stor bragd. Dette viser at lokalsjukehusa er heilt avgjerande for den akuttmedisinske beredskapen i Noreg, slår partileiar Bjørnar Moxnes fast. (©NPK)
