Frå 1. juli blir det lov for kommunane å danne samkommunar.
Gjennom samkommunemodellen kan kommunane samarbeide på tvers av mange sektorar og om fleire ulike oppgåver under eit felles folkevald samkommunestyre, heiter det i ei pressemelding frå Kommunal og regionaldepartementet. Ein samkommune er ei sterkt formalisert form for interkommunalt samarbeid, kor kommunane har eit felles politisk organ med administrasjon og fageiningar for felles løysning av oppgåver. Slik står kommunemodellen beskriven i ein rapport utvikla for KS, og denne modellen blir gjerne sett som eit alternativ til kommunesamanslåing, heiter det vidare i rapporten.
– Dette gir dei folkevalde høve til å sjå dei ulike områda i samanheng og dermed kunne gjere dei rette prioriteringane, sa kommunalminister Liv Signe Navarsete etter at samkommunemodellen vart vedteken av Kongen i statsråd 25. mai.
– Eg vil oppfordre kommunane til å leggje vekt på god folkevald styring og kontroll når dei etablerer ulike samarbeid – ikkje minst på så viktige område som helse og velferd, sa statsråden
Nye reglar for eit styrkt lokaldemokrati kjem også på plass frå 1. juli. Dei nye reglane vil få noko å seie i forholdet mellom lokalpolitikarar og administrasjonen i kommunane. Kommunestyra skal no mellom anna ta stilling til kven dei ønskjer skal lage med innstillingar i politiske saker, og dei må behandle ei sak om delegeringsreglementet kvar valperiode.
– Kven som innstiller i politiske saker og kven som blir delegert ansvar viktige saker er viktig for lokaldemokratiet. Å ta stilling i slike spørsmål gjer kommunestyret medvite på kva slags avgjerder det sjølv skal ta, og kva administrasjonen skal bestemme. Innstillinga legg premissar for debatten. Difor bør kommunestyret vere medvite på kven det ynskjer skal lage den, seier Navarsete.
