Fire av dei åtte kommunane som tapte stort på amerikanske risikofond, reknar med at opptil åtte år til må gå før rekninga er betalt.
Dei fleste klarer oppgjeret utan store kutt i velferdstilbodet, skriv Nationen.
Innbyggjarane i Vik i Sogn ser ut til å bli hardare ramma enn dei som bur i dei sju andre Terra-kommunane.
– Sidan 2008 er eit eldresenter langt ned, symjebassenget er tømt for vatn, skulestrukturen endra og vi har kutta i seniortiltak og sentraladministrasjonen. Vi har heller ikkje hatt pengar til utviklingsarbeid, og vi måtte innføre eigedomsskatt på privathus og fritidsbustader, fortel rådmann Oddbjørn Ese.
Sparekniven har skore djupt også i Nordland-kommunane Hattfjelldal og Hemnes. Hattfjelldal har skore ned med 10 prosent på alle budsjett, og i Hemnes har dei også kutta litt på alt.
I Bremanger utgjer tapa nesten 60.000 kroner per innbyggjar, og ordføraren reknar med at kommunen må slite med rekninga heilt til 2017.
I Narvik måtte heile toppadministrasjonen i kommunen gå ettersom Terra-smellen på 188 millionar kom på toppen av fleire år med driftsunderskot.
Både Rana kommune i Nordland og Haugesund i Rogaland dekte inn siste rest av tapet på rekneskapen i 2009. I 2010 vil Kvinesdal kommune innfri alle krav til budsjettoverskot.
Totalt for alle åtte Terra-kommunane ser rekninga ut til å hamne opp mot 1.100 millionar kroner. (©NPK)
