Høgre er nesten dobbelt så stort som Frp, viser ei meiningsmåling som Norstat har gjort for NRK i mai månad.
Målinga gir Høgre 33,7 prosent. Partiet tar eit skikkeleg jafs på heile 4,8 prosentpoeng. Frp taper 2,6 prosentpoeng og blir notert på 17,2 prosent.
Kvar fjerde Frp-veljar frå 2009 er gått til Høgre, godt over 150.000 veljarar, seier målinga.
Frp-leiar Siv Jensen seier det er mange veljarar å vinne tilbake. Trass i det veldige gapet mellom dei to store på borgarleg side, meiner ho 17 prosent er eit godt utgangspunkt for dei knapt fire månadene som står att til valet.
Målinga gir Ap ei oppslutning på 27,3 prosent, nærmast uendra frå månaden før. Regjeringspartiet Sp får ein tilbakegang på 2,1 prosentpoeng og landar med 3,3 prosent under sperregrensa.
For dei andre partia er det berre mindre utslag. (NPK)
