Romsdals Budstikke-journalist Iver Gjelstenli (64) fekk onsdag NTBs språkpris. Han får prisen for sine kortreiste reportasjar.
– Gjelstenli skriv godt på bokmål, og endå betre på nynorsk. Her er ingen langhalm. Gjelstenli går rett på poenget, sa juryleiar Lars Aarønæs då han delte ut prisen under NTBs språkfrukost.
Gjelstenli tek lesarane med ut på tur kvar laurdag. Det har han gjort dei fem siste åra. Reportasjeserien skulle eigentleg gå over ti veker, men blei så populær at han 31. mai i år kan feire femårsjubileum.
64-åringen har ingen planar om å gi seg med dei kortreiste reportasjane. Idélista er framleis lang, og formidlingsgleda like stor. Kanskje blir det ei bok ut av det til slutt også.
– Vi har snakka om det, seier Gjelstenli.
Kortreistreportasjane har allereie utvikla seg til ein reiseportal på nett.
NTBs språkpris blei oppretta i 2007 og blir delt ut til journalistar og andre aktørar som markerer seg med eit godt skriftleg språk i media. Prisvinnaren får 10.000 kroner og ei karikaturteikning av seg sjølv.(NPK)
Romsdals Budstikke-journalist Iver Gjelstenli fekk NTBs språkpris. Kortreiste reportasjar er spesialiteten hans, og språket er fortreffeleg skriv juryen i grunngjevinga. Foto: Cornelius Poppe / NTB scanpix
