Periferifestivalen har fått heidersprisen Målkipo 2009 frå Sotra Mållag.
– Det er som å få karakteren S på ein nynorskstil på ungdomsskulen, sa presseansvarleg Helga Golten frå Periferifestivalen då ho takka for prisen frå Sotra Mållag.
Festivalen er i utgangspunktet ein musikkfestival, men har og kunst, litteratur og konferansar på programmet. Dei nyttar konsekvent nynorsk i all marknadsføring.
– Festivalar av liknande slag brukar gjerne både engelsk og halvgodt bokmål for å presentera seg. Slik er det ikkje med arrangøren som held til i sjøkanten på Glesvær. Dei nyttar skikkeleg nynorsk som også er krydra med gode uttrykk frå dialekten på staden, sa Karstein Bjørge, leiar i Sotra Mållag, ifølgje avisa VestNytt.
Sotra Mållag gav også ein Målblome til Sartor Storsenter. Deira «Samfunnsrapport 08» er utelukkande på nynorsk. Mållaget vonar at både senteret og andre verksemder på Sotra ser verdien av å bruka nynorsk i vidare samfunnskontakt og marknadsføring. (©NPK)
