Kommunane blir underlagt stadig sterkare statleg styring, syner ein ny rapport utarbeidd av Difi, Direktoratet for forvalting og IKT.
Difi har undersøkt utviklinga av statleg styring på områda grunnskule, helse og omsorg og miljøvern i kommunane i ein tiårspreiode. Her kjem det fram at omfanget av lover, forskrifter, rettleiarar og rapporteringsskjema har auka monaleg og har gjort det lokale handlingsrommet mindre.
– Fleire rettigheitsreglar har kome den siste ti-årsperioden. Rettigheiter er meint å prioritere visse grupper og sikre likskap for desse på tvers av kommunegrenser. Men det er eit tankekors at når mange grupper får konkrete rettskrav mot kommunen, vil dette binde lokal ressursutnytting, gje auka byråkrati og gje lite lokalt handlingsrom, seier kommunalminister Liv Signe Navarsete i ei pressemelding.
Med stadig fleire plikter, individuelle rettar å betene og stadig strengare krav til rapportering får mange kommunar problem med både kapasitet og kompetanse til å overhalde lovpålagte plikter.
Navarsete seier ho ikkje er vidare glad for den utviklinga som rapporten syner og ho varslar no ein stortingsdebatt om utfordringa.
Meir om denne saka kan du lese i LNK-avisa som kjem i mai.
