Olaug Nilssen håpar prosjektet Diktarvegen skal få stor betydning for henne som forfattar.
– I Odda har dei lukkast med å bygge opp eit omdømme som litteraturby, og det betyr mykje ikkje berre for forfattarane som kjem derifrå, men også for dei som kjem i kontakt med byen under litteratursymposiet. Ein blir sett! Ein blir høyrt! Ein blir lest! Eg håpar Diktarvegen oppnår eit liknande omdømme og at dette blir til gagns både for døde og nolevande forfattarar langs rv 13, seier Olaug Nilssen til avisa Nashornet.
Nilssen er frå Solheimsdalen I Førde, no er ho busett i Bergen. Ho debuterte med romanen Innestengt i udyr i 1998. I 2002 kom Vi har så korte armar, i 2005 gav Nilssen ut artikkel – og essaysamlinga Hybrideleg Sjølvgransking, same året kom også romanen Få meg på, for faen. I 2009 gav ho ut portrettboka Nesten frelst av Sigvart Dagsland.
Diktarvegen er eit pilotprosjekt og det første i sitt slag i Noreg. Det var i Ulvik i april 2009 arbeidet med å etablera eit felles litteratur- og kulturnettverk med Fjordvegen som bindeledd starta, i vår vart det også arrangert diktavegkonferanse i Balestrand. Aktuelle samarbeidspartar for vidareføringa er dei nasjonale forfattarorganisasjonane, reisemålsselskap / Fjord Norge, Nasjonale turistvegar, kommunane, fylkeskommunane og regionråda langs RV 13, Innovasjon Noreg og næringslivet.
Landssamanslutninga av nynorskkommunar (LNK), Nasjonalt Garborgsenter, Rasmus Løland-markeringa 2007-2011, Olav H. Hauge-stiftinga, Sivle-laget og Jakob Sande-stiftinga står bak prosjektet.
Rasmus Løland-markeringa i Suldal gir ut ei årleg avis som heiter Nashornet. I år samarbeider avisa, som kjem ut denne veka, med prosjektet Diktarvegen og Fjordvegen.
I avisa kan du lese meir om Diktarvegen og kva som skjer langs rv. 13.
