Det var aldri aktuelt å trekkja seg, seier Liv Signe Navarsete om den tunge tida til Senterpartiet det siste året.
Gåvesaka, ulovleg partistøtte og målingar under sperregrensa er mellom sakene som har ridd partiet det siste året.
– Det har vore tøft å stå i dei stormane som har vore, og svara for det partiet må svara for uavhengig av mi eiga involvering i prosessane. Som leiar er eg ansvarleg for alt, og det ansvaret har eg teke, seier Navarsete til Bergens Tidende.
Men det var aldri aktuelt å trekkja seg, slik mange spekulerte i.
– Eg har heile tida tenkt på kva som er det beste for partiet. Å kasta partiet ut i ein leiarkamp i tillegg til alle andre kampar, hadde absolutt ikkje vore det beste for partiet. Difor har eg teke ansvar, seier Navarsete.
Ho har takla verre kriser personleg tidlegare. I 1992 blei ho enkje med to små barn.
– Når du møter motgang blir du anten knekt eller sterkare. Uansett kor viktig både partiet og det å vere statsråd er, så blir det sett i perspektiv i forhold til å oppleva den krisa det er å mista nokon nær deg. Eg trur det er éin av grunnane til at eg klarer å halda meg roleg, seier Navarsete.
På det komande landsmøtet vil den nye olje- og energiministeren Ola Borten Moe bli valt til ny nestleiar. Navarsete legg ikkje skjul på at dei ikkje er einige om alt.
– Men forholdet vårt er veldig godt, trass det inntrykket enkelte media har hatt lyst til å skapa. Noko av det eg synest har vore mest trist, er dei løgnaktige påstandane om at eg verken vil ha Marit Arnstad eller Ola Borten Moe opp og fram, seier Navarsete. (©NPK)
