– Det er viktig at innvandrarane får lære den målforma som ligg nærast opp til målføret der dei blir buande, seier styreleiar i LNK, Jan Magne Dahle.
Dahle seier seg samd med påtroppande leiar Janne Nygård i Norsk Målungdom som meiner språkopplæring og integrering går hand i hand. Han sluttar seg også til den positive reaksjonen på at Kunnskapsdepartementet no slår fast at ein må bruke meir nynorsk og dialekt i norskopplæringa for minioritetsspråklege.
– Tilbodet i mengd på læreverk er ikkje godt nok, det er om lag ein til tjue mellom nynorsk og bokmål. I samarbeidet med VOX har me likevel prioritert å få eitt godt læreverk på plass, og dei lærarane me samarbeider med meiner no at Norsk Pluss er eit fullgodt læreverk. I neste omgang ynskjer desse lærarane seg tekstsamlingar på nynorsk som kan brukast på fleire nivå, seier Jan Magne Dahle og legg vekt på at ein deretter må auke talet på læreverk slik at dei som underviser på nynorsk også har ein valfridom i forhold til didaktisk innretning og metodiske utfordringar.
